ജലമലിനീകരണ പരിഹാരത്തിനുള്ള കമ്പോള പരിഹാരത്തിന്റെ അന്തഃസത്ത ജലം പരിമിതികളില്ലാതെ നിലനില്‍ക്കുന്നുവെന്ന ധാരണയാണ്, വര്‍ദ്ധിച്ച വിനിയോഗം സാദ്ധ്യമാക്കുക വഴി കമ്പോളത്തിന് മലിനീകരണം ശമിപ്പിക്കാനാവുമെന്ന ആശയം, ജലത്തെ ഒരു പ്രദേശത്തേയ്ക്ക് വഴിതിരിച്ചുവിടുകവഴി മറ്റേതെങ്കിലും പ്രദേശം ജലദൗര്‍ലഭ്യതയിലേയ്ക്ക് വലിച്ചെറിയപ്പെടുകയാണെന്ന വസ്തുതയെ അംഗീകരിക്കാന്‍ കൂട്ടാക്കുന്നില്ല.
ജലമലിനീകരണത്തിന് കമ്പോള പരിഹാരം നിര്‍ദ്ദേശിക്കുന്ന കോര്‍പ്പറേറ്റ് സൈദ്ധാന്തികന്മാരില്‍നിന്നും വ്യത്യസ്തമായി, തൃണമൂല്‍ സംഘടനകള്‍ രാഷ്ട്രീയവും പാരിസ്ഥിതികവുമായ പരിഹാരത്തിനായാണ് ശ്രമിക്കുന്നത്. ഉയര്‍ന്ന സാങ്കേതികവിദ്യാ വ്യവസായങ്ങള്‍ സൃഷ്ടിക്കുന്ന മലിനീകരണത്തിനെതിരെ പൊരുതുന്ന സമൂഹങ്ങള്‍ നിര്‍ദ്ദേശിക്കുന്നത് കമ്മ്യൂണിറ്റി എന്‍വയണ്‍മെന്റല്‍ ബില്‍ ഓഫ് റൈറ്റ്‌സാണ്. അത്, ശുചിത്വപൂര്‍ണ്ണമായ വ്യവസായം, അപകടകരമായ വസ്തുക്കള്‍ പുറന്തള്ളുന്നതില്‍നിന്നുള്ള സംരക്ഷണം, നിരോധനം, അറിവ്, പങ്കാളിത്തം, സംരക്ഷണം നടപ്പാക്കലും നഷ്ടപരിഹാരവും, ശുചീകരണം എന്നീ അവകാശങ്ങള്‍ ഉള്‍ക്കൊള്ളുന്നതാവണം.25 ജലജനാധിപത്യത്തിനുള്ള അടിസ്ഥാന ഉപാധികളാണ് ഈ അവകാശങ്ങള്‍. ഇതനുസരിച്ച് എല്ലാ പൗരന്മാര്‍ക്കും ശുദ്ധജലത്തിനുള്ള അവകാശം സംരക്ഷിക്കപ്പെടണം. കമ്പോളത്തിന് ഇവയിലൊന്നുപോലും ഉറപ്പുവരുത്താനാകില്ല. ജലജനാധിപത്യത്തിന് നിദാനമായ ഒമ്പത് തത്വങ്ങള്‍ ചുവടെ കൊടുക്കുന്നു.
1. ജലം പ്രകൃതിയുടെ ദാനമാണ്
നാം പ്രകൃതിയില്‍നിന്നും ജലം സൗജന്യമായി സ്വീകരിക്കുന്നു. നമ്മുടെ നിലനില്പിന് ആവശ്യമാംവിധം ഈ ദാനം ഉപയോഗിക്കാനുള്ള കടപ്പാട് നമുക്ക് പ്രകൃതിയോടുണ്ട്. അത് ശുചിയായും ആവശമായത്ര അളവിലും സൂക്ഷിക്കേണ്ടതുണ്ട്. ഒരു പ്രദേശത്ത് വരള്‍ച്ചയും ജലക്ഷാമവും സൃഷ്ടിക്കുന്ന വഴിതിരിച്ചുവിടലുകള്‍ ജലജനാധിപത്യത്തിന്റെ തത്വങ്ങളുടെ ലംഘനമാണ്.
2. ജലം ജീവന് അനിവാര്യമാണ്
എല്ലാ ജീവജാലങ്ങളുടെ ജീവന്റെ ഉറവിടം ജലമാണ്. ഈ ഭൂമിയിലെ ജലത്തില്‍, എല്ലാ ജീവജാലങ്ങള്‍ക്കും പാരിസ്ഥിതികവ്യവസ്ഥയ്ക്കും അര്‍ഹമായ പങ്കിനുള്ള അവകാശമുണ്ട്.
3. ജീവന് ജലത്തിലൂടെ പരസ്പരബന്ധിതമായിരിക്കുന്നു
ജലചംക്രമണത്തിലൂടെ ജലം ഈ പ്രപഞ്ചത്തിലെ എല്ലാ ജീവജാലങ്ങളേയും പ്രദേശങ്ങളെയും ബന്ധിപ്പിക്കുന്നു.
4. നിലനില്പിനായുള്ള ജലം സൗജന്യമാവണം
പ്രകൃതി തീര്‍ത്തും സൗജന്യമായാണ് ജലം നമുക്ക് നല്‍കുന്നതെന്നതുകൊണ്ടുതന്നെ, അത് ലാഭത്തിനുവേണ്ടി വാങ്ങുന്നതും വില്‍ക്കുന്നതും പ്രകൃതിയുടെ ദാനത്തില്‍ അന്തര്‍ലീനമായ അവകാശത്തെ നിഷേധിക്കുന്നു. ഒപ്പംതന്നെ ദരിദ്രര്‍ക്ക് അവരുടെ മാനുഷികമായ അവകാശങ്ങള്‍ നിഷേധിക്കുകയും ചെയ്യുന്നു.
5. ജലം പരിമിതമാണ്, അതുപയോഗിച്ച് തീരാവുന്നതുമാണ്
നിലനില്പിന് അനുരോധമായല്ലാതെ ഉപയോഗിച്ചാല്‍ പരിമിതമായ ജലം ഉപയോഗിച്ചുതീരാവുന്നതാണ്. പ്രകൃതിക്ക് വീണ്ടും നല്‍കാവുന്നതിലേറെ വെള്ളം പാരിസ്ഥിതികവ്യവസ്ഥയില്‍നിന്ന് ഊറ്റിയെടുക്കുന്നത് നിലനില്പിന് അനുരോധമല്ല അത് പാരിസ്ഥിതികമായ അസ്ഥിരത സൃഷ്ടിക്കുന്നു. അവനവന് നീതിയുക്തമായി അവകാശപ്പെട്ടതിലേറെ ഉപയോഗിക്കുന്നത് മറ്റുള്ളവര്‍ക്ക് ന്യായമായി ലഭിക്കേണ്ട പങ്ക് നിഷേധിക്കലാണ് (സാമൂഹ്യ അസ്ഥിരത).
6. ജലം പരിപാലിക്കപ്പെടണം
പാരിസ്ഥിതികവും നീതിപൂര്‍വകവുമായ പരിധിക്കുള്ളില്‍നിന്ന് നിലനില്പിനാവശ്യമാംവിധം ജലം ഉപയോഗിക്കാനും പരിപാലിക്കാനും ഏവര്‍ക്കും ചുമതലയുണ്ട്.
7. ജലം ഒരു പൊതുവസ്തുവാണ്
Water is a commons. ജലം മനുഷ്യന്‍ കണ്ടുപിടിച്ച ഒന്നല്ല. അതിനെ ബന്ധിക്കാന്‍ പാടില്ല. അതിന് അതിരുകളുമില്ല. സഹജമായും (സ്വാഭാവികമായും) അത് പൊതുവാണ്. അതിനെ സ്വകാര്യവല്‍ക്കിക്കാനും ഒരു ചരക്കാക്കി വില്‍ക്കുവാനും പാടില്ല.
8. നശിപ്പിക്കാനുള്ള അവകാശം ആര്‍ക്കുമില്ല
ജലവ്യവസ്ഥയെ അമിതമായി ഉപയോഗിക്കാനോ, ദുര്‍വിനിയോഗം ചെയ്യാനോ പാഴാക്കുവാനോ മലിനമാക്കുവാനോ ആര്‍ക്കും അവകാശമില്ല. ട്രേഡബിള്‍ പൊലൂഷനുള്ള അനുവാദം സുസ്ഥിരവും നീതിയുക്തവുമായ ഉപയോഗത്തിന്റെ നിയമങ്ങളെ ലംഘിക്കുന്നതാണ്.
9. ജലത്തിനു പകരംവയ്ക്കാന്‍ മറ്റൊന്നില്ല
ജലം ഇതര വിഭവങ്ങളില്‍നിന്നും നൈസര്‍ഗികമായും വ്യത്യാസപ്പെട്ടിരിക്കുന്നു. അതിനെ ഒരു ചരക്കായി പരിഗണിക്കാന്‍ പറ്റുകയില്ല.
ലേഖനം ഇവിടെ നിന്ന്
Saturday, December 3, 2011
Subscribe to:
Post Comments (Atom)
0 comments:
Post a Comment